Հայաստանի կառավարության շենքի մոտ այսօր` հոկտեմբերի 20-ին, բանակում զոհված զինծառայողների ծնողների եւ «Բանակն իրականում» նախաձեռնության հերթական ակցիան ընթացել է ոստիկանների եւ ակտիվիստների բախմամբ:

Ցուցարարները խաղաղ պայմաններում զոհված զինծառայողների նկարներով եւ պաստառներով իրենց բողոքն էին հայտնում` նշելով, որ Հայաստանի իշխանությունները ոչինչ չեն ձեռնարկում միջադեպերի հանգամանքները պարզելու ուղղությամբ:

Ակցիայի մասնակիցներին էր միացել նաեւ Ազգային Ժողովի «Ժառանգություն» խմբակցության պատգամավոր Զարուհի Փոստանջյանը, ով NEWS.am-ի թղթակցի հետ զրույցում գնահատելով բանակում տիրող իրավիճակն ու զինված ուժերի ղեկավարության արձագանքն այդ դեպքերին, նշեց. «Այդ արձագանքն ուղղակի անթույլատրելի է: Հանրային հեռուստատեսությամբ արված հայտարարությունը պարզապես անընդունելի էր: Դրան գնահատական տրվեց հասարակական կազմակերպությունների կողմից, բայց կարծում եմ, որ այդ հայտարարությանը պետք է տրվի նաեւ համարժեք իրավական գնահատական, որովհետեւ դա սպառնալիք էր ոչ միայն ՀԿ-ներին, այլ նաեւ ողջ հասարակությանը: Այս մտահոգող իրավիճակն արագ լուծումների պահանջ է դնում հենց իշխանությունների առջեւ, մինչդեռ իշխանությունները լուծումներ տալու փոխարեն նման արձագանքներ են տալիս: Սա կարելի է բնորոշել, որ իշխանությունները հանցակից են, ավելին` հովանավորում են բանակում կատարվող հանցագործությունները»:

Ակցիան բավական խաղաղ էր ընթանում, մինչ այն պահը, երբ կառավարության շենքից սկսեցին դուրս գալ գործադիր իշխանության անդամները: Ոստիկանապետ Ալիկ Սարգսյանն իր ուղեկիցների հետ որոշեց անցնել հենց ցուցարարների միջով, իսկ նրա թիկնապահներն ու ոստիկանները, ակտիվիստների փոխանցմամբ, հրեցին նախաձեռնության ակտիվիստներին: Ի պատասխան բողոքի ակցիայի մասնակիցները սկսեցին վանկարկել «Ամոթ», իսկ ակտիվիստ Վարդգես Գասպարին սկսեց վանկարկել «Տականք, մի հրիր»: Ալիկ Սարգսյանը հրաժարվեց պատասխանել զոհվածների ծնողների եւ լրագրողների հարցերին եւ հեռացավ:

Քիչ ավելի ուշ, երբ ակցիայի մասնակիցները որոշեցին երթ անել դեպի նախագահական նստավայր եւ պահանջել Սերժ Սարգսյանի հրաժարականը, կառավարության շենքի ժամացույցի մոտ եւս մեկ միջադեպ եղավ: Իրավապահները փորձեցին ձերբակալել Վարդգես Գասպարիին, ով պառկել էր գետնին: Միջադեպի ընթացքում ոստիկանները հրեցին ԱԺ պատգամավոր Զարուհի Փոստանջյանին եւ ակցիայի մի քանի այլ մասնակիցների, իսկ Գասպարիին ուժով նստեցրին մեքենա եւ տարան:

Ակցիայի մասնակիցներն այս պահին նախագահական նստավայրի մոտ են եւ պահանջում են Սերժ Սարգսյանի հրաժարականը:

Հիշեցնենք, որ օրերս պաշտպանության փոխնախարար Վլադիմիր Գասպարյանը վիրավորական արտահայտություններ էր թույլ տվել բանակում տիրող վիճակի դեմ հանդես եկողներին եւ անգամ սպառնացել, թե այլ միջոցների կդիմի