Երեւանում մայիսի 24-ին երիտասարդ փեսան դանակահարել է կնոջն ու զոքանչին:

Ինչպես NEWS-ին հայտնում է ֆոտոլրագրող Գագիկ Շամշյանը, ոստիկանության Էրեբունու բաժնում «Էրեբունի» բժշկական կենտրոնից ահազանգ է ստացվել, որ մարմնական վնասվածքներով մայիսի 24-ին ժամը 20-ի սահմաններում իրենց մոտ են տեղափոխվել մայր ու աղջիկ:

Հիվանդանոց մեկնած ոստիկանության Էրեբունի բաժնի օպերատիվ քննչական խումբը` բաժնի պետ Գրիգոր Գրիգորյանի գլխավորությամբ պարզել է, որ նույն օրը ժամը 15:00-ի սահմաններում, տանը վիճաբանության ժամանակ 26-ամյա Արարատ Զիլֆիմյանը իր մոտ եղած ծալովի դանակով հարվածներ է հասցրել սեփական զոքանչին` 40-ամյա Մարո Մանուկյանին եւ կնոջը`25-ամյա Գոհար Բաղումյանին:

Ձեռնարկված օպերատիվ միջոցառումների արդյունքում, ոստիկանության Էրեբունի քրեական հետախոզության բաժանմունքի աշխատակիցները փեսային հայտնաբերել են Սասունցի Դավթի կայարանամերձ հրապարակում եւ բերման ենթարկել ոստիկանություն:

Նրա մոտ հայտնաբերվել է ծալովի դանակը, որն առգրավվել ու ուղարկվել է ոստիկանության փորձաքրեագիտական կենտրոն, նշանակվել է դատահետքաբանական, մատնադրոշմային փորձաքննություն:

Վիրավոր զոքանչին ու նրա աղջկան տրվել է դատաբժշկի ուղեգիր: